नातेपुते येथील मंगल कार्यालयातील सोन्याच्या दागिन्याची चोरी उघड पुणे येथून महिला आरोपीकडुन मुद्देमाल हस्तगत

संपादक: साप्ताहिक बहुजन भूषण वृत्तपत्र

नातेपुते पोलिस स्टेशन यांचेकडून मिळालेल्या माहितीनुसार

नातेपुते येथील चैतन्य मंगल कार्यालयात लग्नाच्या गडबडीत एका महिलेच्या पर्समधून सोन्याचे दागिने लंपास करणाऱ्या महिला चोरट्याला नातेपुते पोलिसांनी तांत्रिक विश्लेषणाच्या आधारे पुणे येथून अटक केली आहे. आरोपी महिलेकडून चोरीस गेलेले तब्बल ३ लाख ९८ हजार ७५५ रुपये किमतीचे सोन्याचे दागिने पोलिसांनी हस्तगत केले आहेत. 

नेमकी घटना काय?

दिनांक १४ मे २०२६ रोजी नातेपुते येथील चैतन्य मंगल कार्यालयात विवाह साखरपुड्याचा कार्यक्रम सुरू होता. यावेळी वर कक्षात साखरपुड्याच्या तयारीमध्ये नातेवाईक व्यस्त असताना फिर्यादी हर्षवर्धन रामचंद्र ठोंबरे यांच्या आईच्या खांद्याला अडकवलेल्या पर्समधून अज्ञात चोरट्याने सोन्याचे दागिने चोरून नेले बाबत नातेपुते पोलीस ठाणे गु.र.नं.२१३/२०२६ भारतीय न्याय संहिता कलम ३०३ (२) प्रमाणे गुन्हा दाखल करण्यात आला होता. त्या गुन्हयाचा पुढील तपास पो.ना/५६२ राकेश लोहार हे करीत आहेत.

आरोपीची गुन्हा करण्याची पद्धतः- (Modus Operandi)

तपासा दरम्यान असे दिसून आले की, आरोपी महिला मंगल कार्यालयातील गर्दीचा आणि लग्नाच्या गडबडीचा फायदा घेते. फिर्यादी व त्यांचे नातेवाईक साखरपुड्याच्या तयारीमध्ये किंवा फोटो काढण्यात व्यस्त आहेत का? याचे ती बारकाईने निरीक्षण करते. त्यानंतर संधी मिळताच अतिशय शिताफीने पर्सची चैन उघडून दागिने चोरून, कोणालाही संशय येणार नाही अशा पद्धतीने ती तिथून पसार होते.

पोलिसांची धडाकेबाज कारवाई:

गुन्ह्याचे गांभीर्य ओळखून नातेपुते पोलिसांनी सी.सी.टी.व्ही फुटेजच्या आधारे तपासाची चक्रे फिरवली. गोपनीय बातमीदार आणि तांत्रिक माहितीचे (Technical Surveillance) विश्लेषण करत असताना सदरचा गुन्हा जयश्री विलास दगडे (वय ३५, रा.खुळेवाडी, पुणे) मुळ रा.शेलगाव, ता.करमाळा, जि.सोलापूर व धnजय दशरथ पवार (वय ४०, रा.खुळेवाडी, पुणे मुळ रा.अंतरवली ता.भुम, जि.धाराशिव यांनी केल्याचे निष्पन्न झाले. पोलिसांनी तातडीने पुणे येथे सापळा रचून आरोपी महिलेला व तिचा साथीदार यांना ताब्यात घेतले. चौकशी दरम्यान गुन्ह्याची कबुली दिली असून महिला आरोपीकडून चोरीस गेलेले सर्व सोन्याचे दागिने जप्त करण्यात आले आहेत.

यशस्वी कामगिरीः

    सदरची कारवाई सोलापूर ग्रामीणचे पोलीस अधीक्षक श्री.अतुल कुलकर्णी, अप्पर पोलीस अधीक्षक श्री.विजय कबाडे आणि अकलूजचे उपविभागीय पोलीस अधिकारी श्री.प्रशांत ढगळे (सहा. पोलीस अधिक्षक) यांच्या मार्गदर्शनाखाली पार पडली. 

    नातेपुते पोलीस ठाण्याचे सहा. पोलीस निरीक्षक श्री.विशाल वायकर, पो.स.ई. सोनल मोरे, सहा.पोलीस नाईक राकेश लोहार, पोलीस अंमलदार रणजीत मदने, महिला पोलीस अंमलदार सिमा सोनवणे, सायबर पोलीस ठाणेचे पोलीस अंमलदार प्रविण मेटकरी तसेच पो.कॉ/२७७८ हरिप्रसाद पुंडे, पो.कॉ/ ९९२५ लालू क-हे विमानतळ पोलीस ठाणे यांच्या पथकाने ही यशस्वी कामगिरी केली.

बातमी

अधिक जाहिरातीसाठी संपर्क

संपादक : मा.श्री. डॉ. अभिमन्यु बी. आठवले

९४२०३०२५६१

उपसंपादक : वैभव अ. आठवले

साप्ताहिक बहुजन भूषण, साप्ताहिक बहुजन मित्र वृत्तपत्र

संस्थापक : बहुजन राष्ट्रशक्ति सामाजिक संघटना महाराष्ट्र राज्य

                       टीप : जे दिसले, जे पाहिले तेच लिहिले हेच वृत्तपत्राचे ध्येय उद्दीष्ट आहे.